كانت الساعه تقريبا 11 بليل وده وقت انا كنت بحب ألعب فيه لعبة #بابجي
وطبعا اي حد لعب اللعبه دي هيعرف أنها بتحتاج تركيز جدا ويمكن أسواء حاجه ممكن تحصل أن حد يرن عليك وانت في اللعبه
وده فعلا الـ حصل
فضلت ترن ترن وانا اكنسل لحد ما في لحظه عصبيه مني فتحت عليها وزعقت فيها جامد وشتمتها وقفلت في وشها
هيا اصلا طبيعتها أنها زنانه ولحوحه لأبعد مما تتخيله
المهم خلصت الجيم وفتحت المسينجر لقيتها بتقولي كلام غريب
والله هو الـ رن عليا وانا مكنتش عارفه أن ده رقمه وخلاص انا هغير رقمي
حقيقه كلامها فاجأني واستغربته في الاول
لكن استوعبته بعدها بشويه
لان قبل ما ابدا جيم بابجي انا كنت رنيت عليها وهيا مردتش لكن هيا كانت ويت ( أنتظار ) في مكالمه اخري
لكن اصلا انا مخدتش بالي بس هيا افتكرت ان اما زعقت وشتمتها اني بزعق للسبب ده تقدر تقول الـ علي راسه بطحه !
قولتلها : انتي تغيري رقمك متغيريش رقمك خلاص دي حاجه متخصنيش بس كفايا لحد كدا
قالت : لا لا متقوليش كفايا انا هغير رقم وانت مش هتسبني ودي اخر مره ده يحصل
انا اسفه اسفه
بصراحه انا ف وقتها كبرت دماغي من كلامها وهيا فضلت ترن الليل كله لحد الصبح تقريبا
وجه تاني يوم لقيت واحد صحبي بيكلمني ويقولي أن ف وحده اسمها أمنيه دخللت كلمته اما عرفت اني صحبه وقالت له انه لازم يوصلني بيك
قولتله : سيبك منها دي عيله مجنونه وانا اصلا لسه عارفها من اسبوع وخلاص كبرت دماغي منها !
سكت شوي
وجه في نفس اليوم بليل لقيته بعتلي رساله بيقولي الحق البنت بعتالي رساله بتقولي انها هتنتحر لو مكلمتهاش أدخل كلمها يا عم بدل ما تجبلك مصيبه
قولتله : كبر دماغك منها تنتحر اي بس دي حورات بنات وقديمه جدا ! تعالي بس نلعب بابجي
وفعلا بدأنا جيم بابجي وكانت الساعه تقريبا 2 صباحا
وفي اثناء الجيم لقيت أِشعار بث مباشر علي الفيسبوك من حساب أمنيه !
بفتح البث والاقيها بتوجه رساله ليا وهيا ماسكه برشام وعمال تشرب كل كلمه حبايه وتوجه ليا كلام زي ( انت مش لازم تسيبني انا بحبك ومكدبتش عليك )
انا في ذهول من الـ بيحصل ده ودماغي هتتفرتك مش عارف مفروض اعمل اي ! ولكن لقيتها في البث بدأت تدوخ وتتعب وشبه بدأت تفقد الوعي
الحمد لله ربنا أكرمني وعرفت افكر وتذكرت انها من يومين رنت عليا من رقم غالبا تبع حد في البيت
وفعلا اتصلت علي الرقم ده ال طلع رقم أبوها ! طبعا الراجل كان نايم واما بقوله الحق أمنيه بتنتحر برا فكرني ف البدايه بهزر وبعاكس لكن أثبتله اما قولتله بأماره شكل الستاره عندكم لونها بيج !
هنا الراجل فز وقام جري لبرا وساب الموبايل او وقع منه
ومن جهه تانيه البث شغال وفعلا البنت كانت فقدت الوعي أخدها ونزل جري علي المستشفي
وفضلت معاهم لحد تاني يوم الضهر تقريبا لحد ما اطمنت عليها انها قامت
وابوها كلمني وقالي شكرا انك اتصرفت وكلمتني واستأذنك ابعد عن بنتي !!
قولتله : حاضر , وبعدها من كتر السهر والتعب نمت
صحيت علي أمنيه بترن عليا واول ما فتحت المكالمه لقيتها بتقولي
أمنيه : أنت مش هتسبني صح مش هتبعد عني هتفضل تكلمني عشان انا بحبك وهموت لو بعدت عني
انا : اه يا أمنيه مش هسيبك ومش هبعد عنك
في الحقيقه مكنش في كلام ينفع اقوله لشخصيه مجنونه زي دي غير ان علي الاقل أراضيها لحد ما أنسحب من حياتها بهدوء وتدريجي !
أكمل القراءه
تعليقات
إرسال تعليق